अलग व्हेगेन Garhwali Poem By Pardeep Singh Rawat Khuded

जड़ड़ू गोळू एक छौ फौंगा अलग व्हेगेन।
सुण मा आणी पल्या मौ का बी अलग व्हेगेन।।

ज्यू लाट निसड़ू एक च डांगा अलग व्हेगेन।
बाब दादा एक छन पर फंगा अलग व्हेगेन।।

द्यौ  देब्ता एक छन द्यीव धूपोणू अलग व्हेगेन।
अब त दुख बिपदा मा बी उचेणू अलग व्हेगेन।।

खोळ एक च पर पैणू पातू अलग व्हेगेन।
डिंडाळी एक च पर अब बाटू अलग व्हेगेन।।

लुहार एक च पर अब पयार अलग व्हेगेन।
औजी एक च पर अब डडवार अलग व्हेगेन।।

धारू पंदेरू एक च पर अब बंठा अलग व्हेगेन।
छौ एक जू सोनो टूकड़ा वू कंठा अलग व्हेगेन।।

खातु खतोनी एक च पर हिसाब अलग व्हेगेन।
डाक डाकनू एक च पर किताब अलग व्हेगेन।।

हाँ अगर अलग नि व्हे त,
बाबा जी कि छाया माँ जी कू दुलार।
दै दादों की ओट दिशा ध्याण्यू प्यार।।


प्रदीप सिंह रावत ”खुदेड़“