आज जब फ्योंली दर्जा चार पास कना बाद, पांचवीं कक्षा मा बैठी त भौत खुश छै, आज भले विंकी किताब कॉफी पुरैणि छै पर वीं पढ़ण वोळी मस्टेनि नयी छे, हालांकि रोज वा सबसे एथरे लैन मा बैठदि छैं पर आज वा अबेर मा ऐ छे त इले सबसे पैथर बैठि छै,
मस्टेनि जी सब बच्चों तैं आज रावण पर एक निबन्ध लेखणु तैं दे, फ्योंलिन कुछ इन निबन्ध लिखी कि मस्टेनि जी न वे निबन्धो तैं गलत बोली सकिनन अर न वे निबन्ध तैं सही मान सकिन, फ्योंलिन निबन्ध कुछ ये तरो से लेख्यू छौ, कि रावणन राक्षस कुल मा जन्म ले छौ, अर वु शराब बि भौत पेन्दू छौ, शराब त म्येरु बुबा रामचरण बि पेन्दू, शराब पेकि म्यारू बुबा म्येरि माँ तैं भौत मरदु, ब्याली रात बि म्यार बुबान म्येरि माँ तैं बिजा मारी, जैकि बजह से म्येरि माँ आज जल्दी उठी नि साकी इले हि मि इस्कूल अबेर मा पौंच्यो, पर रावणन कबि बि अपड़ी ब्वारी तैं मारी नि च, वू त भौत प्यार करदु छौं अपड़ी ब्वारी तैं, इख तके कि वेकि ब्वारी गैहणो लकदक बणी रैन्दी छे, रावणा अपड़ी ब्वारी पर इतगा गैहणा पैराया रैन्दा छा कि क्या ब्वन, पारसी मिन जब टीबी पर रामायण देखी त तब म्ये पता चली, पर म्येरा बुबान त म्येरि माँ का सब गैहणा बेचिन, एक अंगूठी ज्व म्येरि माँ कि म्येरा जवैं कु तैं रखि छे बागदान मा पैराणु तैं वा बि बेच दे, पिछला मैना माँ जब नन्या गौं गै छे त बाबान बक्सो तालु तोड़ी अर वीं अंगोटी तै मुल्य खोळ दुकादर बव्डा मा बेच ग्य, अब पता नि म्येरु बागदान जन्मा ह्वलु ता,
जब मस्टेनि यू निबन्ध पौढ़ी त मस्टेनि जी समझि नि सकिन कि फ्योंली तैं दस मदि दस नंबर दयों या दस मदि जीरो, आप बतावा कतगा नम्बर मिलण चैंदा फ्योंली तैं,
