घटा छंटेगी,
फ़िज़ा बदलेगी ।
सैद चुनाव ऐगी ।
कुकर बाघ बिरोवू,
बांदर नेवला गुरोवू ।
किले आज एक व्हे होला,
संसद मा भ्याळी तक,
लगांदा छ जू आरोप ।
आज स्यू नेक किलै व्हे होला,
सैद चुनाव ऐगी ।
गरीबा घार मा आज दिन मा,
किलै द्वी जग्यूचा ।
सेठा दुर्पला मा आज,
किलै झंडा टंग्यूचा ।
सैद चुनाव ऐगी ।
भ्याळी तक गौमा,
बेरोजगारू की भरमार छै।
जनता भी पांच सालो ,
हिसाब ले की तैयार छै।
पर आज सरू गौ खाली,
सैद चुनाव ऐगी ।
गौ- गौमा किलै फूट व्हे होलि,
भै-भै मा किलै टूट व्हे होलि।
सैद चुनाव ऐगी ।
आज स्यू लोवू स्याळ ,
मुंगरा किलै नि भूखाणू होलू।
आज थानेदार लोखू तै,
आँखा किलै नि दिखाणू होलू।
सैद चुनाव ऐगी ।
किलै आज कल हेलिकॉप्टर
उड़णान हवा मा।
शेरूदा किलै टैट बण्यु होलू
सुबेर बटी पव्वा मा।
सैद चुनाव ऐगी ।
किलै आजकल क्वी उतारनू पहनू च,
सराफत कू नकाब।
किलै आजकल वैष्णो ढाबा मा,
बिकण बैठी सराब कबाब।
सैद चुनाव ऐगी ।
किलै आज दिन रात का पहर,
शैद घुमणा छन। (सफ़ेद पोशाक वाले)
किलै आज कुछ खास लोग,
गुजरों कि गुजरायण सूंघणा छन।
सैद चुनाव ऐगी ।
प्रदीप सिंह रावत ''खुदेड़''
verry nice
ReplyDelete